Magapadala sang sulat si Sigma, Capiz Mayor Dante Rizal Eslabon sa 2nd district engineering sang Department of Public Works and Highways (DPWH) agud magpatigayon sang structural assessment sa building sang Vicente Andaya Sr. National High School (VASNHS).
Ini kasunod sang magnitude 5.4 nga linog nga nag-igo sa Masbate kag nabatyagan sa probinsya sang Capiz nga nagresulta sa mass hysteria ukon pag-panic kag anxiety sang pila ka mga estudyante sang eskwelahan.
Sa interview sang Bombo Radyo kay Mayor Eslabon, iya ginpahayag nga gilayon ini nga nagsinapol kaupod ang mga opisyal sang eskwelahan agud talakayon ang mga tikang kag malikawan ang kapareho nga insidente.
Ginpahayag man sini mas maayo, indi anay pag-gamiton ang amo nga building tubtob matapos ang assessment sang DPWH agud masiguro ang kaluwasan sang mga estudyante kag mga empleyado.
Dugang pa sini nga kinahanglan padayon nga magapatigayon sang regular nga earthquake drills ang eskwelahan agud mangin handa ang tanan sa tion sang linog kag malikawan ang pagpanic.
