Wala sang may nabalhag nga kaso sang Children in Conflict with the Law (CICL) kag Children at Risk (CAR) ang Sigma, Capiz sa una nga quarter sang tuig 2026.
Sa interview sang Bombo Radyo kay Lovely Joy Gacer-Monares, Social Worker Officer II sang Sigma Municipal Social Welfare and Development Office, iya ginpahayag nga isa ka mayo nga resulta nga wala sang kaso sang pagka-involved sang mga kabataan a iligal nga aktibidad subong nga una nga quarter sang tuig 2026.
Suno kay Monares, ang mga cases sang nagligad nga tuig 2025 ang padayon man nga ginabuligan agud mahatagan sang nagaigo nga intervention.
Pahayag pa niya, padayon man ang ila nga koordinasyon kaupod ang kapulisan sa mga eskwelahan kag mga barangay agud mahatagan sang aksyon kun may yara sang kabataan nga makompirma nga na-involved sa krimen ukon biktima sang pagpang-abuso ukon violence.
Naghingyo man ang natungdan sa publiko nga indi magkahadlok sa pag-report agud mabuligan sang mas temprano ang mga kabataan kag gilayon nga mahatagan ang tsansa nga magbag-o.
