ROXAS CITY – Nagpaathag karon ang alkalde sang banwa sang Sigma angut sa low compliance grade ukon manubo nga grado nga ila nabaton sa implementasyon sang road clearing operation sang Department of Interior and Local Government (DILG).
Ginpahayag ni Mayor Christopher Andaya nga sang una indi klaro ang guidelines sang DILG kag wala sang ginpahamtang nga parameters ang ahensiya angut sa implementasyon sini, rason nga low compliance ang ila nabaton nga grado.
Aminado ang opisyal nga nagdumdum ini nga ang pag-parked lamang sang mga salakyan sa higad sang karsada ang sakup sang amo nga mandu, sa diin didto nagsentro ang ila nga implementasyon.
Ginpanindugan man ni Andaya nga wala sila nagpabaya sa ila obligasyon, sa diin nakita sini mismo ang effort sang iya mga personnel.
Ginbaton man ini sang alkalde nga isa ka paghangkat sa ila banwa kag pagatinguhaan nga mapataas ang ila rating sa masunod nga mga inadlaw.
