ROXAS CITY – Ginmandu sang bag-o pungko nga alkalde sa Sigma, nga ipasirado ang mga establisiyemento kag negosyo nga naga-operate apisar nga nag-expire ukon wala sang business permit, sa ila banwa.
Ini ang ginkumpirmar ni Sigma Mayor Dante Eslabon, sang napakig-angutan sang Bombo Radyo.
Suno diri, nagmandu na ini sa mga katapo sang Business Permit and Licensing Office (BPLO), Treasurer’s Office, Municipal Engineer’s Office, PNP kag BFP nga tsekyaron ang mga puwesto sang negosyante ilabi na sa merkado, kun nagproseso ang mga ini sang business permit, kag sa mapaslawan nga makaproseso, ang pagapauntaton.
Nahibaluan nga may kapin 13 ka mga establisiyemento ang natigayon nga mapasirado, sa una nga semana sa pagpungko ni Mayor Eslabon.
Pahanumdom sini sa mga negosyante nga mangin legal ang ila pagnegosyo, mag-renew ukon maggawad sang business permit bangud para ini sa ika-umwad sang ila banwa.
Sa pihak nga bahin, indi man luyag si Eslabon nga magpuyo ang mga residente sa kilid sang suba bangud tuman ini ka delikado, gani gina-encourage sini nga magbiya sa lugar.
Sa tion nga magpakatig-a ang mga residente, mapilitan ang alkalde nga ipatuman ang demolition.
Apang sa karon, mahimo nga makighinala sa opisina sang alkalde agud ma-istoryahan sang maayo ang amu nga tikang, kag pagapangitaan sang paagi nga ma-relocate ang mga maapektuhan nga residente.
