ROXAS CITY – Ginadula na sang mga katapo sang Sigma Municipal Police Station ang motibo sang suspek nga pagpangawat nga rason sa paglabo-patay sa isa ka senior citizen nga nasapwan sa sulod sang iya balay, sa Sitio Ilawod, Barangay Parian, banwa sang Sigma, sang Setyembre 13, 2022.
Ini ang ginpahayag ni PLt. Reynaldo Lata, hepe sang Sigma MPS, sang mainterview sang Bombo Radyo.
Suno diri, isa ang pagpangawat sa ila ginlantaw nga motibo bangud nadula ang P1,500 nga payout sa social pension sang biktima nga si Virgilio Calipayan Sorallo, 69-anyos, antes ang krimen.
Apang sa padayon nga imbestigasyon sang imbestigador, nahibaluan nga naggasto na sang biktima ang amu nga kuwarta antes ini ginpatay, kun sa diin, ginbayad sini ang P500 sa iya utang, P500 nga ginbakal sini sang bulong sa uyapad kag P300 ang iya ginpanindhan, gani P200 nalang nabilin sa iya.
Bangud sini, may person of interest na ang mga kapulisan sa pagpatay sa tigulang apang indi pa nila sa karon mapalayag sa publiko bangud nagapadayon ang ila pagpangalap sang ebidensiya.
Matandaan ni Jose Sorallo ang iya utod nga nagapaligo sang kaugalingon nga dugo kag may pilas sa ulo nga tuga sang pagpanglabo, sang tion nga ginhagad kuntani sini nga maglambo sang ila karabaw.
Nahibaluan nga nagaisahanon sa iya balay ang biktima, apang yara man sa amu nga sitio naga-istar ang pila sini ka mga kabataan.
