Ginpasidunggan sang Silver Eagle Award sang Capiz Police Provincial Office ang Sigma Municipal Police Station bangud sa maayo nga pagpatuman sang ila mga katungdanan kag pagserbisyo sa publiko.
Sa interview sang Bombo Radyo kay Police Major Narciso V. Sables Jr., Officer-in-Charge sang Sigma Municipal Police Station, iya ginpahayag nga isa sa mga rason sang ila pagkilala amo ang pagnubo sang kaso sang krimen sa banwa.
Suno kay Sables, daku nga bulig ang maayo nga komunikasyon kag pagbinuligay sang kapulisan sa nagkalain-lain nga sektor sang komunidad, ilabi na sa paghibalo kag pagsolbar sang mga problema kag kabalaka sang publiko.
Dugang pa sini, importante ang aktibo nga pagpakig-angot sa mga pumuluyo agud makahimo sang husto nga mga pamaagi kag mapauswag pa ang serbisyo sang kapulisan.
