Nagpahanumdom ang Sigma Municipal Police Station sa publiko, ilabi na sa kababaihan kag kabataan, parte sa ila kinamatarong kag proteksyon sa idalom sang Republic Act 9262 ukon Anti-Violence Against Women and Their Children Act of 2004.
Sa interview sang Bombo Radyo kay Police Major Narciso V. Sables Jr., Officer-in-Charge sang Sigma Municipal Police Station, iya ginpahayag nga ginadumilian sang amo nga layi ang nagkalain-lain nga pagpang-abuso pareho sang pisikal, sekswal, emosyonal kag pinansyal nga pagpang-abuso.
Suno kay Sables, may kinamatarong ang mga biktima nga magpangayo sang temporaryo ukon permanente nga protection order halin sa barangay ukon korte agud maprotektahan ang ila kaugalingon batok sa nagapang-abuso.
Gani, ginapanawagan sang kapulisan ang mga biktima nga gilayon nga mag-report sa Women and Children Protection Desk (WCPD) agud mabuligan kag mahatagan sang nagakaigo nga tikang.
