ROXAS CITY – Ginklaro sang pamunuan sang Sigma Municipal Police Station nga wala sang pulis nga yara sa ila istasyon ang nagpositibo sa Coronavirus Disease 2019 ukon COVID-19.
Suno kay Police Captain Christian Mahometano, hepe sang Sigma PNP, yara na karon sa isolation facility sang Capiz Police Provincial Office ang isa ka katapo sang pulis matapos nga naka-close contact sini ang nagpositibo nga Non-Uniformed Personnel (NUP) sa Police Regional Office 6 (PRO6) sa syudad sang Iloilo.
Apang, gindugang sini nga sadtong Agosto 19 sang ginpaidalom sa isolation ang nasambit nga pulis kag natalana nga ipaidalum sa rapid test sa masunod nga semana.
Samtang, kapin 15 naman ka mga PNP Personnel ang nagapabilin sa karon nga naka-isolate sa amo nga istasyon bilang pagsunod sa mga health minimum protocols ukon precautionary measures.
Nagabantay naman ang mga katapo sang Capiz Provincial Mobile Force Company sa palibot agud masiguro nga hilway sa virus ang mga residente sang nasambit nga banwa.
