SIGMA, CAPIZ – Ginapadalman sang mga kapulisan sa banwa sang Sigma ang imbestigasyon sa pagluthang-patay sa maglive-in partner sa Sitio Sibunag Ilawod, Barangay Mianay, Sigma, Capiz.
Ginpahayag ni Police Lt. Rey Jason Gimeno, hepe sang Sigma PNP nga padayon ang ila nga imbestigasyon agud matumod kun sin-o ang yara sa likod sa pagluthang-patay sa maglive-in partner nga sanday Rodrigo Nepomuceno kag Rondalia Casi.
Sa karon nagaba-se lamang sila sa ila imbestigasyon sa mga circumstantial evidence nga gikan sa mga testigo, video footage kag CCTV camera.
Ginahulat man sa karon sang kapulisan ang resulta sang ila ginpalab-ot nga mga ebedensiya agud makabulig sa ila nga imbestigasyon.
Liwat nagpanawagan si Gimeno sa sin-o man nga may nahibaluan sa insedente nga magpakig-angut sa Sigma PNP agud mahatagan sang hustisya ang kamatayon sang mga biktima.
