SIGMA, CAPIZ – May ginasunod na nga anggulo ang mga katapu sang Sigma Municipal Police Station angut sa posible motibo sa pagluthang kay Barangay Kagawad Lamberto ‘’Nono’’ Fajartin sang Barangay Pinamalatican sa amo nga banwa.
Sa pagpakig-angut sang Bombo Radyo kay Police Lt. Rey Jason Gimeno, hepe sang Sigma PNP, ginpahayag sini nga may ginatan-aw na sila nga motibo sa insedente, apang nagapangita pa sang dugang nga mga ebedensiya.
Nagaguha sa imbestigasyon nga pagkatapos sang general assembly sa 1st quarter sang konseho nagsaka ang mga opisyales sang barangay sa ibabaw sang barangay hall.
Apang ginkakibot ni Kapitan Gilda Bignayan sang may nagsaka nga duha ka mga kalalakinhan nga nakasuksok sang face mask kag ginpangita si Kagawad Fajartin.
Nagsabat si Bignayan nga nagpauli na ang nasambit nga kagawad, apang hinali sila ginpahapa kasunod ang pagpalapit kay Fajartin sang mga suspek.
Ginsiling nga naghambal pa ang biktima nga hatagan ini sang tsansa nga maka-explikar apang wala ini ginpamatian kag gilayon nga gintiro kag naigo sa ilong.
Pagkatapos sang insedente, gilayon nga nagsakay sa ila motorsiklo ang mga suspek kag nagbiya sa lugar.
Narekober sang mga pulis sa ginluntaran sang krimen ang isa ka basiyo sang .45 caliber pistol.
Ba-se sa impormasyon nga nakita na ang presensiya sang duha ka mga suspek sa guha sang barangay hall kag ang ila ginasabat sa nagapamangkot kun maano sila nga may yara sila sang transaksyon kay Kagawad Fajartin.
