Ginapabaskog pa sang sang Sigma Municipal Police Station ang seguridad sa mga eskwelahan ilabi na sa pagsulod kag pagguwa sang mga estudyante bilang kabahin sang security plan sang kapulisan sa Sigma, Capiz.
Sa interview sang Bombo Radyo kay Police Major Narciso V. Sables Jr., Officer-in-Charge sang Sigma Municipal Police Station, iya ginpahayag nga ang pagpatuman sang security measures ginahimo sandig sa direksyon sang Provincial kag Regional Police Office kag sa paggiya man ni Mayor Dante Rizal Eslabon.
Suno kay Sables, kabahin sa ginapatuman ang padayon nga regular coordination sang kapulisan sa mga eskwelahan agud masiguro ang kaluwasan kag kaayuhan sang mga estudyante kag mga personnel.
Ginpabutyag man ni Sables nga ginpasangkad pa ang police presence sa palibot sang eskwelahan kag regular nga ginakumusta ang welfare sang mga estudyante.
Dugang pa sang natungdan, may yara man sang walk-through detector nga ginapatuman sa mga designated nga eskwelahan bilang dugang nga security measure.
