Ginapanindugan sang Simbahan Katolika nga ang All Souls’ Day ang indi lamang pagdumdom sa nagtaliwan nga mga pinalangga kundi isa man ka kahigayunan nga mapadalom ang pagtuo kag pagpati sa kabuhi nga wala sing katapusan.
Sa interview sang Bombo Radyo kay Rev. Fr. Virgilio Ciudadano Jr. sang Archdiocese sang Capiz, iya ginpahayag nga indi dapat pagpanumdumon sang mga katoliko ang kamatayon sang ila mga pinalangga nga katapusan na sang tanan, sa baylo dapat mangin pahanumdom ini sang promisa sang Dios nga kabuhi nga wala sang katapusan.
Suno kay Fr. Ciudadano, importante nga mahangpan nga ang kamatayon isa lamang ka bahin sang kabuhi sang tawo, apang wala ini nagakahulugan nga ang tanan matapos sang dalayon.
Pahayag pa niya, ang All Souls’ Day nagaserbe nga pahanumdom nga padayon nga ipangamuyo ang mga kalag sang mga nagtaliwan kag huptan ang pagtuo sa saad sang Dios nga kabuhi nga wala sing katapusan.
Dugang pa sang natungdan, sa pihak sang pagpangasubo sa mga pinalangga nga nagtaliwan, dapat magpabilin ang paglaum kag pagtuo nga ang kabuhi wala nagatapos sa kamatayon.
