Nagapanawagan ang Simbahan Katolika kay President Ferdinand Marcos Jr. nga ipakigbahin ang matuod nga kahimtangan sang nagkalain-lain nga mga sektor sa pungsod sa iya ikalima nga State of the Nation Address (SONA).
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga ginalauman nila nga mabatian mismo halin sa presidente ang mga tikang nga ginhimo sang administrasyon agud masolusyunan ang nagapadayon nga krisis nga ginaatubang sang sector sang mga mangunguma, manugpangisda, mga driver, kag sang sektor sang edukasyon.
Suno kay Msgr. Oso, importante man nga mahibaluan sang publiko kon ano na ang nahimo sang gobyerno sa pagtuman sang mga promisa sini, lakip na ang pagpapanabat sa mga opisyal nga ginatudlo nga lakip sa kurapsyon.
Dapat mahatag ang klaro nga sabat kon may yara na gid man sang mga napapanabat kag may mga kaso nga gin-aksyonan.
Ginpahayag man sini nga nag-abot na ang tion nga maghugpong ang tanan sa pagpanawagan para sa maayo nga pang-gobyerno, bangud ang nagapadayon nga mga problema sa ekonomiya kag serbisyo publiko amo ang mas nagapabug-at sa kabuhi sang ordinaryo nga mga Pilipino.
Dugang pa sang natungdan, magpabilin nga mabinantayon o vigilant sa ila palibot kag indi magkahadlok sa pagpabati sang ila tingog agud magpangayo sang reporma, pagbag-o, kag mas maayo nga pagdumala sa pungsod.
