Nagpahanumdom ang Simbahan Katolika sang importansya sang pagpalig-on sang pagtuo sang mga kabataan agud mangin giya nila sa pagpakabuhi kag sa pagpakita sang maayo nga pamatasan.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga ang una nga responsibilidad sa paggiya kag paghulma sang kabataan nagahalin gid sa ila mga ginikanan.
Suno kay Msgr. Oso, importante nga ang mga ginikanan amo ang mangin una nga ehemplo sa pagpakabuhi nga may pagtuo, respeto kag disiplina, bangud sila ang mas daku nga impluwensya sa pagdaku sang ila kabataan.
Dugang pa niya, dako man ang papel sang simbahan kag sang eskwelahan sa pagpadayon sang espiritwal kag moral nga pormasyon sang mga kabataan, apang kinahanglan nga magtinabangay ang pamilya, simbahan kag komunidad agud mapabakod ang ila mga kinaiya.
Ginpabutyag man sini nga sa tunga sang nagakadamo nga mga impluwensya sa social media kag teknolohiya, mas kinahanglan nga mapalig-on ang pundasyon sang pagtuo agud ang mga kabataan mangin responsable sa ila mga desisyon kag malikawan ang pag-uyon sa mga indi maayo nga binuhatan.
Gina-agda man sang natungdan ang mga ginikanan nga maghatag sang igo nga oras sa ila kabataan pinaagi sa pag-istoryahanay, pagpangamuyo upod sa pamilya, kag pagdasig sa ila nga magpartisipar sa mga kalihokan sang simbahan agud mangin responsable, matinumanon, kag may pagtuo nga mga miyembro sang komunidad.
