ROXAS CITY – Indi pabor ang simbahang katolika nga I-legalize ang Divorce sa pungsod.
Ini ang ginpahayag ni Monsignor Policarpio John Luza, parish priest sang Sta. Monica Parish Church sa banwa sang Panay sang mainterview sang Bombo Radyo Roxas.
Suno kay Msgr. Luza nga indi sila kumbinsido sa ginaduso nga hagna sang gobyerno nga himuon legal ang dibursiyo.
Bangud indi ini ang solusyon sa problema sang mag-asawa ilabi na sa bug-os nga pamilya.
Gin-athag man ni Msgr. Luza nga ang pagpakasal ang isa ka sacramento.
Magluwas diri ang pagpakasal wala nagasandig sa kaayuhan sang isa lang ka partner kundi sa kapag-on sang ila relasyon kun may magtuhaw nga mga problema.
Dugang pa sini nga ang divorce amu ang nagapanguna nga rason sa iban nga pungsod kon ngaa madamu ang broken families kag apektado nga mga kabataan.
Matandaan nga nakapasar na sa House Committee on Family Relations ang hagna nga absolute divorce kag dissolution of marriage.
Gin-aprubahan ang nasambit nga hagna sang gamiton sang mga kongresista ang Rule 48 sang manubo nga panalgan sang Kongreso.
