ROXAS CITY, CAPIZ – Nagpahanumdom ang Simbahang Katolika sa publiko nga likawan ang Simbang ‘Ligaw’ kag Simbang ‘Puto Bumbong’ sa siyam ka adlaw nga Simbang Gabi umpisa Disyembre 16 tubtob Disyembre 24.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga ang Simbang ‘Ligaw’ amo ang mga kabataan nga wala man nagasimba sa baylo nagapakigkita sa ila nobyo ukon nobya samtang ang Simbang “Puto Bumbong” naman amo ang mga indibidwal nga wala man nagasimba kag nagalagaw lang sa guwa sang simbahan kag magkaon.
Suno kay Msgr. Oso, nagakadapat nga hatagan sang igtalupangod sang mga pamatan-on si Hesu Kristo agud nga makilala kag mahakos.
Dugang pa sang natungdan, ang mga nagatambong sa Simbang Gabi ang kinahanglan nga magpamati sang sinsero sa pagbasa sa sulod sang santos nga misa agud ma-eksperyensyahan ang presensya ni Hesu Kristo.
