ROXAS CITY, CAPIZ- Ginpatpat sang isa ka pari sang Simbahang Katolika sa Roxas City, ang nagkalain-lain nga mga schedule sang patigayunon nga mga misa sa tion sang tigkalalag.
Sa interview sang Bombo Radyo kay Reverend Father Edsel V. Delfin, Parish Priest sang Immaculate Conception Metropolitan Cathedral, iya ginpahayag nga magapatigayon sang misa sa nagkalain-lain nga patyo sa syudad, partikular sa Banica Catholic Cemetery, Cagay Catholic Cemetery kag Divine Jesus Memorial Park sa Banica.
Suno kay Father Delfin, dululungan nga magapatigayon sang Liturhiya sa Pulong kag Bendisyon sang mga Nitso sa Nobyembre 1 takna las 4:00 sang hapon sa nasambit nga mga patyo.
Pahayag nya, natalana naman sa Nobyembre 2 ang Santos nga Misa, sa diin nga sa Banica Catholic Cemetery, patigayunon ini sa takna las 8:00 sa aga, kag sa takna las 9:00 naman sang aga sa Divine Jesus Memorial Park kag Cagay Catholic Cemetery.
Dugang pa sang natungdan, ang amo nga aktibidad ang isa ka pamaagi sa pagdumdom sa mga nagtaliwan sa diin nga amo ang dako nga dulot sa ila pamaagi sa pagpangamuyo.
Interviewed by Bombo Chris Jan Hechanova Lozada
