ROXAS CITY – Magalawig tubtob sa Nobyembre 4, 2025 ang “Oplan Byaheng Ayos: Undas 2025” nga ginapatuman sang Land Transportation Office (LTO).
Sa interview sang Bombo Radyo kay Atty. Gaudioso Geduspan II, Regional Director sang LTO 6, iya ginpahayag nga subong nga adlaw ginpatigayon ang simultaneous send off ceremony para sa second phase sang “Oplan Byaheng Ayos: Undas 2025” nga nagatutok sa visibility sang mga personnel, pagpabaskog sang road sign inspection kag road worthiness.
Suno kay Atty. Geduspan, may yara sang masobra 100 ka mga deputized personnel ang Land Transportation Office Region 6 agud magbantay kag mag-monitor sa sitwasyon sang mga dalanon ilabi na sa mga terminal kag pantalan samtang nagahilapit ang tigkalalag.
Na-obserbahan sang regional director nga apisar pila pa man ka adlaw ang nabilin antes ang Nobyembre 1, kadam-an sa mga terminal sa Western Visayas ang ginadagsa na sang mga pasahero.
Nagpahanumdom man si Director Geduspan sa mga driver nga siguruhon nga nagasunod sa traffic laws kag mga pagsulundan agud mangin matawhay ang pagbyahe kag madul-ong sang safe ang mga pasahero.
