ROXAS CITY – Liwat magapatawag sang isa ka sinapol ang alkalde sang siyudad sang Roxas agud mahitsu ang mga aktibidad para sa Sinadya sa Inmaculada Concepcion 2019.
Ini ang ginpahayag ni City Mayor Ronnie Dadivas sang mainterview sang Bombo Radyo.
Suno kay Dadivas, may mga inisyal na sila nga plano para sa amo nga kahiwatan kun sa diin iya ginpamatian ang mga suhestiyon agud maayo pa ang nasambit nga selebrasyon.
Apisar indi sang tuman nga magarbo suno sa opisyal, lauman sang mga pumuluyo ang pila ka mga ‘innovations’ nga pagahimuon agud mangin maduagon ang okasyon.
Kalakip suno kay Dadivas sa ila pagatutukan amo ang pagpasiguro nga may partisipasyon ang pumuluyo sa selebrasyon bangud sa isa ka festival suno diri, dako ang papel sang pumuluyo.
Suportahan man sini ang mga aktibidad sang religious sector para sa amo nga selebrasyon.
Sa karon suno sa alkalde ginatinguhaan na nga matapos ang interactive landmark lighting sa Roxas City Public Plaza agud mahingagaw sa amo nga selebrasyon ilabi pa nga nagahilapit naman ang Paskwa.
Ginpasalig man sini ang pagpadasig sa mga road-concreting projects sang siyudad agud indi makaapekto sa selebrasyon kun sa diin ginalauman nga magadugok ang tawo.
Nag-apelar man ini sang hugot nga kooperasyon sa pumuluyo pinaagi sa simple nga pagka-responsable sa ila nga basura agud mapabilin ang katinlo sang siyudad kag makaganyat pa sang mga bisita.
