ROXAS CITY – ‘Peaceful and orderly’.
Ini ang paglaragway Police Lt. Col Ricardo Jomuad, Jr., ang hepe sang Roxas City Police Station sa bag-o gid lamang nagtakop nga Sinadya 2019.
Suno kay Jomuad nga nangin malinong kag matawhay sa pangkabug-usan ang nasambit nga selebrasyon.
Suno diri nga may yara lamang sang napagkit nga isa ka insidente sang pagpangtapungol apang gilayon man ini nga napungguan kag na-refer sa barangay.
May napagkit man nga hacking incidente kag biktima sang peke nga kwarta apang suno sa opisyal, indi ini makabig nga Sinadya 2019 related incident.
Dako man nga kadalag-an para sa hanay sang pulisya ang tatlo ka madinalag-on nga drug buybust operation kun sa diin tatlo man ka mga drug suspek ang nagkaladakpan.
Duha sa amo nga operasyon ang ginkasa sang Roxas City Police Station kag isa naman ang ginkasa sang Provincial Drug Enforcement Unit.
Mahibaluan nga masobra 500 ka mga katapo sang Philippine National Police, Philippine Coast Guard, Philippine Drug Enforcement Agency (PDEA), Traffic Management Unit, Roxas City Emergency Response Team (RCERT) kag iban pa nga law enforcement unit ang nagpasiguro sang kalinong kag katawhay kadungan sang nasambit nga selebrasyon.
May yara sang gintukod nga Task Group Sinadya 2019 kun sa diin nag-serbi nga Task Group Commander ang provincial director sang Capiz PPO nga si Police Col. Julio Gustilo Jr.
Ang Sinadya 2019 ang ginhiwat humalin Disyembre 3-9, 2019.
