Ipatuman sang Singapore ang bag-o nga mga layi nga nagatinguha protektahan ang mga pumuluyo batok sa online sexual abuse, lakip na ang paggamit sang artificial intelligence (AI) sa paghimo sang malaw-ay ukon intimate nga mga litrato nga wala sang pahanugot.
Sa idalom sang bag-o nga layi, mangin krimen na ang paghimo sang intimate images, lakip ang AI-generated materials, nga wala sang consent sang tawo nga yara sa amo nga material.
Ang mga makit-an nga nakalapas mahimo mapriso tubtob duha ka tuig kag multa.
Mas mabug-at pa gid ang penalidad kun ang biktima menor de edad kag wala pa nagalab-ot sa 14 ka tuig.
Mahimo man nga kasuhan sa Singapore ang mga suspek nga naggroom sang mga menor de edad sa iban nga pungsod kag sa ulihi naghimo sang sexual offense, kun ang suspek ukon ang biktima nagbiyahe halin sa Singapore antes natabo ang krimen.
Para sa mga biktima nga wala pa nagalab-ot sa 14 ka tuig, mahimo mag-abot sa pito ka tuig nga pagkabilanggo ang silot sa mga mapamatud-an nga nag groom kag nag-abuso sa mga kabataan sa iban nga pungsod.
Suno sa Singapore Ministry of Home Affairs, ang katuyuan sang bag-o nga layi amo ang pagpadali sang pagpatuman sang mga layi batok sa online sexual abuse kag pagpanubo sang paghimo kag pagpalapnag sang AI-generated sexual materials.
