Ginbuyagyag sang Presidential Anti-Organized Crime Commission nga ang Singaporean “big boss” nga si Zhang Jie sang Lucky South 99 sa Porac, Pampanga ang nagbulig kay Alice Guo sa pagtago sa Batam, Indonesia.
Sa ginhiwat nga pulong balitaan sa talatapan sang National Bureau of Investigation (NBI), nagapati ang Department of Justice nga nag gamit sang “backdoor” si Alice Guo, Shiela Guo, Cassandra Ong kag pila pa ka mga kapwa nga akusado agud makaguwa sang Pilipinas.
Kasunod ini sang madakpan sa Indonesia si Shiela Guo, ang utod sang dismissed Bamban Mayor Alice Guo, nakuha sa iya ang duha ka mga passport. Isa ka Philippine passport kag isa ka Chinese passport nga nakapangalan sa isa Zhang Mier.
Suno kay NBI Director Jaime Santiago, nagtugma ang fingerprints ni Shiela sa nasambit nga Chinese national.
Nagapngatubang na sa karon sa kaso nga deportation si Shiela bangud sa undesirability kag misrepresentation.
Samtang, suno sa Department of Justice, temporaryo naman nga igabiya ang pagkansela sang pasaporte ni Alice Guo agud malikawan ang pila ka mga problema nga legal.
Pahayag ni DOJ Secretary Boying Remulla, kumplikahon lang sini ang proseso bangud kun nakansela ang passport ni Alice Guo, mas mabudlayan sa pag-trace kag pagpapauli sini pabalik sa Pilipinas.
