Ginakonsidera sang singer-actress nga si Kakai Bautista nga pasakaan sang kaso ang netizens nga naga-atake sa iya pinaagi sa masakit nga mga komento online.
Nag-ugat ang pag-bash kay Kakai matapos niya apinan ang relasyon nanday PBA courtside reporter Apple David, 33 anyos kag basketball player Chad Gammad, 18 anyos.
Ginsabat ni Kakai ang isa ka post sang isa ka content creator nga may video clip si Apple sa diin isa-isa sini nga ginasabat ang pagpang-bash sang mga indi pabor sa relasyon nila ni Chad.
Lakip sa akusasyon amo ang pagkabig sa iya nga groomer bangud sa kadakuon sang agwat sang edad nila sang iya nobyo.
Wala napunggan ni Kakai nga apinan si Apple kag ginpahayag nga indi dapat maakig ang netizen bangud wala man nagapanghilabot sang kabuhi si Apple kag si Chad.
Ginpahayag man niya nga ang iban sa mga idolo sang netizen sa social media ang other woman ukon other man pa sang mga kawatan nga politiko apang wala man gina-bash.
Bangud sini, nakabaton sang negatibo nga komento si Kakai lakip na ang pagtawag sa iya sang netizens nga enabler kag pedophile.
