ROXAS CITY-Nakapaidalom na sa “Lockdown” ang Sitio Kagitingan, Barangay Cagay sining siyudad kasunod sang pagpositibo sa Coronavirus Disease ukon COVID-19 kun sa diin nagaistar ang mga nagpositibo.
Sa interview sang Bombo Radyo kay Punong Barangay Arturo Aragon Sr., nga nagmando si City Mayor Ronnie Dadivas nga ipaidalom sa lockdown sa sulod sang duha ka semana ang amo nga lugar agud malikawan ang paglapta sang nasambitan nga virus sa amo nga barangay.
Suno kay Aragon nga hugot nga ginadumilian ang paguha kag pagsulod sa nasambit nga barangay.
Sa pihak sini, may yara man sang igahatag nga ayuda ang Roxas City Government para sa mga pumuluyo nga apektado.
Ginpasalig naman sang opisyal nga hugot nga pagabantayan sang mga barangay officials ang nasambit nga lugar agud masiguro nga wala sang may makaguwa kag makasulod sa nasambit nga sitio.
Samtang, gin-athag naman ni Aragon nga ang lima ka mga himata sang magpamilya ang ginpaidalom man sa isolation kun sa diin tatlo diri ang nagnegatibo sa RT-PCR Test samtang ang duha ang ginahulat pa ang resulta sa swab test.
Mahibaluan nga 12 tanan ang miyembro sang magpamilya nga nagpositibo sa COVID-19 kun sa diin 7 diri ang nagpositibo, tatlo ang nagnegatibo kag duha naman ang pending pa ang resulta sang swab test.
