ROXAS CITY – Ginpaidalom sa “Lockdown” ang Sitio Sakop, Barangay Culasi sining siyudad kasunod sang pagpositibo sa COVID-19 sang tatlo ka mga resiente sang nasambit nga lugar.
Sa pagpadulong sang Bombo Radyo News Team sa nasambit nga lugar, hugot nga ginapatuman sang mga otoridad ang border security checkpoint agud masiguro nga wala sang makasulod kag makaguwa nga mga indibidwal.
Nahibaluan nga nagmandu man si Roxas City Mayor Ronnie Dadivas nga wala sang dapat maguwa kag magsulod sa nasambit nga sitio kun indi man lang importante agud malikawan ang paglapta sang virus.
Nagapatigayon man sang rekorida ang mga katapo sang militar agud magpahanumdum sa mga residente natuhoy sa mga ginapatuman nga mga health protocols.
Samtang hugot naman ginasunod sang mga residente ang abiso sang mga otoridad nga magpabilin sa sulod sang ila balay matapos nga wala sang may nakita-an ang hubon nga mga indibidwal nga nagalagaw sa nasambit nga sitio.
Nagpasalig naman ang alkalde sang siyudad nga hatagan sang ayuda nga pagkaon ang mga residente samtang nakapaidalom sa lockdown ang lugar.
