ROXAS CITY – Nagapabilin nga normal ang sitwasyon sa Roxas City Integrated Transport Terminal sa Pueblo de Panay, Barangay Lawaan, Roxas City.
Ini ang sa pihak sang mas ginpa-strikto pa nga mga pagsulundan para sa mga nagaalabutan nga mga indibidwal gikan sa Iloilo City.
Sa paglibot sang Bombo Radyo News Team, na-obserbahan nga padayon sa gihapon ang pag-biyahe sang mga ceres bus liners kag vans nga may biyahe Iloilo-Roxas City vice versa.
Suno kay Manong John, katapo sang amo nga terminal, didto sa Capiz-Iloilo border gina-tsekyar sang mga otoridad ang pila ka rekisitos nga kinahanglanon sa mga pasahero.
Ginapaidalom sila sa thermal gun scanning agud makuhaan sang temperatura.
Ginapangitaan man ang mga ini sang medical clearance/certificate nga balido sa sulod sang 72 oras, Letter of Acceptance (LOA) kag Travel Authority.
Para sa public transport vehicles nga magasulod sa probinsya, kinahanglan nila magsumiter sang ‘passenger manifest’ sa border checkpoints, Vehicle Identification, lugar kun sa diin ini naghalin nga destinasyon, Date and time of departure from origin kag pila ka mga personal nga impormasyon.
Mahibaluan nga ang ini nga lihok ang kasunod sa pagpaidalom sa General Community Quarantine (GCQ) sa siyudad sang Iloilo.
Samtang, ginkompirmar naman ni Janice Original sang Vallacar Transit Incorporated nga sa ila pagtsekyar sa mga pasahero nga nagasakay sa ceres bus gikan sa Iloilo padulong sa Capiz, may pila ka mga rekisitos sila nga gina-tsekyar.
Partikular sini nga gintumod ang medical certificate, valid ID kag kinahanglan nga nakasuksok sang face mask kag face shield ang pasahero.
