ROXAS CITY CAPIZ – Amat-amat na nga masako ang sitwasyon sa Teodoro Arcenas Trade Center (TATC), ilabi na nga nagahilapit na ang pagsug-alaw sa Bag-ong Tuig.
Sa interview sang Bombo Radyo sa Market Administrator sang merkado nga si Ms. Heloise Mendoza, ginpahayag sini nga sa subong nga tyempo indi malikawan nga may mga indibidwal nga ginakuha ang tion agud makapangtunto kag agud malikawan nga mabiktima siguruhon nga mangin aligmat sa personal nga kagamitan bangud suno diri sila man wala naga-untat nga magbantay sa palibot.
Suno kay Mendoza pag-abot sa mga nagabaligya sang karne sa merkado, aminado ini nga istrikto siya sa pagsulundan bangud suno diri importante nga iya mahibaluan nga nag-agi ang ginabaligya nga karne sa slaughter house agud masiguro nga matinlo kag luwas sa bumalakal.
Pananglitan suno diri nga may yara sila sang madakpan nga nagapalusot sang mga karne nga wala nag-agi sa slaughter may yara sang nagakaigo nga penalidad ga paga-atubangon.
Ginpahayag man sini nga pag-abot sa baklanay sang prutas nagapabilin pa nga matawhay kag ginhatagan man niya sang dugang nga 3 meters ang ila sini lugar agud ma-akomodar ang bulutangan sang ila mga baligya ukon stocks nga maga-abot.
Panugyan sini sa mga bumalakal nga sa tion may madiparahan nga irregularidad nga aktibidad sa sulod sang merkado indi magduha-duha nga ireport sa ila talatapan agud gilayon nga mahatagan sang aksyon.
