Ginkumpirmar sang Malacañang nga ginkakas na ang suspension order batuk kay Monalisa Dimalanta bilang chairperson sang Energy Regulatory Commission (ERC).
Sa isa ka memorandum order nagikan kay Executive Secretary Lucas Bersamin nga may petsa October 31, 2024, ginmanduan si Dimalanta nga liwat mag-assume “effective immediately” bilang chairperson kag chief executive officer sang Energy Regulatory Commission.
Ginpahayag naman sang ERC nga nabaton na nila ang memorandum nagikan sa talatapan sang Office of the Executive Secretary.
Ang tikang sang Malacañang, kadungan sang memorandum order nagikan sa Office of the Ombudsman nga may petsa October 22, 2024 kag pirmado ni Deputy Ombudsman Dante Vargas nga nagamando sa lifting sang suspension order sa ERC chief.
Ginhatagan naman sang pagtamod sang Ombudsman matapos ang maid-id nga ebalwasyon sa case record, natumod nila nga wala sang rason agud magpabilin nga preventive suspension batuk kay Dimalanta.
Matandaan nga nagsugod ang six-month suspension kay Dimalanta sadtong Setyembre 9 subong nga tuig, samtang ginaimbestigahan ang reklamo batuk sa iya sang National Association of Electricity Consumers for Reforms Inc. (Nasecore).
Base sa alegasyon sang Nasecore, napaslawan suno diri si Dimalanta nga ipatuman ang pag-regulate sa power rate nga may kaangtanan sa recalculation sang distribution rate sang Manila Electric Company (Meralco).
Bilang ERC chief, tubtob Hulyo 2029 pa magatakop ang termino ni Dimalanta matapos gintalana ni Pangulong Ferdinand Marcos Jr. sadtong Hulyo 2022.
