ROXAS CITY-Maswerte nga wala sang may napilasan matapos nga nadulaan sang preno ang six wheeler dump truck sa patakason nga porsyon sang Barangay Poblacion, Dumalag Capiz.
Sandig sa inisyal nga imbestigasyon sang Dumalag Municipal Police Station nagaguwa nga samtang ginasubay sang six wheeler dump truck nga ginamaneho ni Rio Homeres, 31-anyos, residente sang Barangay Bitoon-Ilaya, Cuartero Capiz ang patakason nga porsyon sang amo nga banwa, ginaalegar nga nadulaan ini sang preno rasun nga nabungguan sini ang ginasundan nga salakyan nga ginamaneho ni Andrea Mae Ely, residente sang Libas Banga, Aklan.
Magluwas diri, ginsalakay man sang amo nga truck ang apat ka mga motorsiklo nga nagapark sa kilid sang dalan.
Nag-angkon sang kasamaran sa nagkalain-lain nga bahin ang mga imbolbado nga salakyan.
Sa karon, padayon pa nga ginaimbestigaran sang mga kapulisan ang amo nga insidente.
