PONTEVEDRA CAPIZ – Indi makapati ang mga himata kag pila ka mga persona nga nakakilala kay Albert alyas “Nilfa” Barrio nga isa ini sa ginaalegar suspek sa pagpatay sa isa ka menor de edad sa Estancia, Iloilo.
Sa exclusive interview sang Bombo Radyo kay Ruben Cortel sang Poblacion Ilaya, Pontevedra Capiz, tiyo ni alyas “Nilfa” nga nakibot ang mga ini sang nabalitaan nga nadalahig ang ila himata sa kamatayon ni alyas “Nonoy”.
Suno kay Cortel nga si alyas “Nilfa” pa gani ang gina “bully” sang pila ka mga kalalakinhan sa banwa sang Pontevedra sang yara pa ini nagaistar sa amo nga banwa.
Sandig naman sa panaysayon ni Marilou Corros, ang nagsapupo sa ginaalegar suspek kag residente man sang amo nga banwa, nga mabuot nga tawo si “Nilfa” kag wala man ini sang masaway sa amo nga persona apisar nga ginapahayag nga may diperensiya ini sa paminsaron.
Mahibaluan nga ginatudlo nga isa sa mga suspek ang nasambit nga LGBTQ member sa pagpatay kay alyas “Nonoy” nga nasapwan sa kilid sang karsada sa Barangay Daan Banua, Estancia, Iloilo.
Ini matapos nga may mga saksi sa amo nga lugar nga ini ang nangin kaupod sang biktima antes ini nasapwan nga patay.
Sa karun, padayon ang imbestigasyon sang mga katapo sang Estancia MPS agud matumod ang duha pa ka mga persona nga sanday “Batang Tun-og” kag “Kalbo Dodoy” nga ginatudlo mga suspek man sa amo nga krimen.
