ROXAS CITY – Nangin matawhay ang palibot sang siyudad sang Roxas kasunod sang ginpatuman nga curfew hours sa probinsya sang Capiz sandig sa implementing guidelines sang Memorandum Order No. 11, series of 2020 ni Capiz Governor Esteban Evan ‘Nonoy’ Contreras agud mapunggan nga makasulod sa probinsiya ang coronavirus disease (COVID-19).
Sa paglibot sang Bombo Radyo News Team sa palibot sang siyudad antes ang natalana nga oras sang curfew makit-an nga malaka na lamang nga mga salakyan kag motorsiklo ang nagaagi sa karsada.
Magluwas diri, pila ka mga establisyemento komersyal naman ang temprano pa nga nagsirado antes ang curfews hours nga nagsugod humalin alas 8 sang gab-i tubtob alas 5 sang aga.
Halos wala naman sang makita nga mga indibidwal ang nagalagaw ukon nagalakat sa mga karsada magluwas na lamang sa mga otoridad nga nagabantay sa palibot sang siyudad.
Ang nasambit nga pagsulundan ginpatuman agud malikawan ang paglapta sang Coronavirus Disease sa probinsya sang Capiz.
