Pilason ang Sk Chairman sang Barangay Bitoon Ilaya, Cuartero lakip ang duha ka kaupdanan sini matapos ang ginapahayag nga gintiro ang mga ini sa Barangay Poblacion Takas, Cuartero, Capiz.
Ginkilala ang SK Chairman kay alyas Enric, 24-anyos. Samtang ginkilala naman ang duha sini ka mga kaupdanan nga sanday alyas Ben, 20-anyos kag alyas Carl, 24-anyos nga lunsay mga residente sang Brgy. Bitoon Ilaya, Cuartero, Capiz.
Sa nakuha nga impormasyon sang Bombo Radyo nagikan sa Cuartero Municipal Police Station, ginpahayag nga nagtulukay lang ang mga biktima kag suspek samtang yara sa isa ka balaklan sang burger sa lugar.
Sa inisyal nga imbestigasyon sang mga kapulisan, nagsinggit ang 37-anyos nga suspek sa 36-anyos sini nga manghod nga tiruhon na ang mga biktima.
Gilayon man nga gintuman sang manghod nga suspek kag gintiro ang mga biktima.
Naigo sa wala nga dalunggan ang Sk Chairman nga si alyas Enric samtang sa buli naman naigo si alyas Ben, wala naman nag-angkon sang pilas ang kaupod pa sang mga ini nga si alyas Carl.
Gilayon naman nga nadakpan ang 37-anyos nga suspek sa ginpatigayon nga hot pursuit operation sang mga kapulisan, samtang nagapabilin naman nga atlarge ang 36-anyos nga manghod sini nga ginatudlo nga gunman.
