PANITAN, CAPIZ – Mabuot nga klase sang bata ang pagkakilala sang Punong Barangay sa SK Chairman nga nagtapungol sa lima ka mga menor de edad sa Barangay Cabangahan, Panitan, Capiz.
Sa interview sang Bombo Radyo kay Hon. Dino Detablan, Punong Barangay sang nasambit nga lugar, iya ginpahayag nga ginkakibot niya ang natabo nga nahimo sang amo nga SK Chairman ang pagtapungol sa lima ka mga menor de edad bangud sa iya nga pagkakilala, mabuot kag matinahuron nga klase sang tawo ang SK Chairman nga si alyas Mark, 21-anyos.
Suno kay Detablan, ipatawag niya ang SK Chairman agud makahinun-anon kag imbestigaran kun ano ang rason sang kinagamo. Matandaan nga nag-angkon sang pilas sa itsura ang duha sa lima ka mga menor de edad matapos nga ginpang-sumbag sini sang SK Chairman sa Barangay Cabangahan, banwa sang Panitan.
Ang mga biktima amo sanday alyas Toto, 16-anyos, alyas Boy, 16-anyos, alyas Nonim, 17-anyos, alyas Petpet, 15-anyos kag alyas Junior, 16-anyos nga lunsay mga residente sang nasambit nga lugar.
Ginpahayag nga samtang nagahampang ang mga ini sang online games sa waiting shed sa ila nga lugar, hinali nalang nga nag-abot ang SK chairman kag una niya nga gintapungol si alyas Junior apang wala ini ginsapak kag ginbatuan sang lima bangud yara ini sa impluwensya sang makahulubog nga ilimnon.
Nagdesisyon na lamang ang lima nga magpauli apang ginlagas pa ang mga ini sang SK chairman kag ginpang-sumbag.
Sa karon, ginahulat na lamang ang sabat sang nasambit nga SK Chairman angut sa nasambit nga insidente.
