JAMINDAN, CAPIZ- Ginpamatud-an sang Sangguniang Kabataan (SK) Chairman sa Barangay Jaena Norte, Jamindan, Capiz nga indi lang basketball ang mga programa nga mahatag sa mga kabataan sa barangay, kundi madamo pa gid nga mga oportunidad para mapaayo ang ila kabuhi, labi na sa aspeto sang edukasyon.
Sa interview sang Bombo Radyo kay SK Chairman James Estores Villasis sang nasambit nga barangay, iya ginpahayag nga pinaagi sang mga resolusyon nga gindihon sang SK kag sang mga miyembro sini, mabuligan ang mga kabataan nga magpursige sa pagtuon kag maglikaw sa malain nga mga buluhaton.
Nahibaluan nga ang nasambit nga mga programa ang ginakalakipan sang:
-Programa para sa mga Board Passers nga magahatag sang mga incentives sa mga kabataan nga nakapasar sa board exams.
-Programa para sa mga Board takers sa diin amo ang paghatag sang suporta kag impormasyon para sa mga kabataan nga magatake sang board exams.
-Financial Assistance para sa mga College Students sa diin amo man ang paghatag sang P500 nga bulig pinansyal kada bukas sang klase sa mga college students sa barangay.
Bangud sang mga programa nga ini, ginpasidunggan si SK Chairman Villasis sa barangay bilang pagkilala sa iya dedikasyon sa pagpaayo sang kabuhi sang mga kabataan kag sa pagsiguro nga magpursige sila sa pagtuon.
Ang iya mga inisyatibo naghatag sang inspirasyon sa mga kabataan nga magpabilin sa tama nga dalan kag magabukas sang mga oportunidad sa palaabuton.
Interviewed by Bombo Sunnie Mae Batencila
