ROXAS CITY – Isa ka dekada na ang nakalikad sang gintukod ang Sangguniang Kabataan Teen Center sa Barangay Banica, Roxas City.
Sa interview sang Bombo Radyo kay Hon. Kriza Fernando, SK Chairwoman kag SK Federation president sa syudad, suno diri nga ang tinutuyo sang pagtukod sang SK Teen Center amu nga mahatagan sang hilway nga lugar ang mga pamatan-on indi lamang sa research ukon mahatagan sang access sa internet, kundi agud makahulam sang libro kag maka-socialize sa iban man nga pamatan-on.
Subong man, agud magserbe bilang ‘safe place’ sa mga kabataan agud malikawan man ang pagpadulong sa mga indi hilway nga lugar.
Dugang pa ni Fernando nga mahimo makapadulong ang bisan indi taga-syudad sang Roxas kun may kinahanglan ang mga ini sa ila research.
Sa karon nga may pandemya hugot man nga ginapatuman ang health and safety protocol.
Bukas man sa pagbaton sang ‘in-kind’ nga donasyon ang teen center sang Barangay Banica.
Panugyan ni Fernando sa kun sin-o man ang magabulos sa iya posisyon nga kun mahimo ipadayon ang pagsuporta sa amu nga proyekto bangud may dako nga bulig sa mga pamatan-on sa ila pagtuon.
