ROXAS CITY – Nagapati ang gobernador sang probinsiya nga patyon lamang ang ekonomiya sang probinsiya sang nagapadayon nga operasyon sang Small Town Lottery (STL) sa Capiz.
Suno kay Capiz Governor Antonio Del Rosario, wala sang maayo nga mabulig ang operasyon sang STL sa Capiz kundi ang magpatay sa ekonomiya sang probinsiya.
Ginkomparar pa sini ang STL sa Lotto sa diin ang STL suno sa gobernador ang nagapangbalay-balay gid agud magpataya sa publiko apang sa Lotto naman, indi makadali-dali kadto ang pumuluyo sa lotto outlet agud makataya.
Ginpanindugan man ni Del Rosario nga wala sang kamatuoran ang hambalanon nga naga-umwad ang isa ka probinsiya kun may yara sang operasyon sang STL.
Dugang pa sini nga wala sang ginakita ang gobyerno sa operasyon sang STL kag ang daku nga nagaganar sini amo ang operator nga Five Star Gaming and Entertainment Corporation.
Ginhangkat pa sang gobernador ang operator sang STL nga magpresentar sang isa ka persona nga nagdaog na sang daku nga kantidad sa STL kag ipahayag kun ano ang nabulig sini sa iya nga pamilya.
Ginpahayag pa sini nga depende pa kun batunon sang gobyerno-probinsiyal ang share sini sa nagapadayon nga operasyon sang STL sa probinsiya.
