ROXAS CITY – Ginkasubo sang consultant sang Small Town Lottery (STL) Capiz ang ginbuy-an nga mandu ni President Rodrigo Duterte angut sa pagsuspende sa tanan nga operasyon kag pagpasarado sa tanan nga Lotto kag STL outlet sa pungsod.
Ginpahayag ni Mr. Jojo Roldan matapos nakalab-ot sa iya ang impormasyon nga ginmanduan sang presidente ang mga pulis kag militar nga pangunahan ang pagpasarado sa mga Lotto kag STL outlet sa ila areas of jurisdiction bangud sa malapanagon nga korupsyon gilayon ini nga nagpatawag sang sinapol sa iya mga nasakupan.
Suno kay Roldan nga apisar dismayado ini, apang iya ginarespeto ang desisyon ni President Duterte kag nagalaum nga may maayo ini nga pakadtuan.
Apang aminado si Roldan nga daku ang epekto sini sa kapin dos mil ka mga indibidwal nga nagasalig sang ila palangabuy-an sa STL kasubong sang mga sales representatives kag supervisors kag regular nga empleyado sini.
Nagahatag man sila sang tsansa sa mga drug surrenderer nga makaangkon sang trabaho agud may yara sila sang mabuhi sa ila pamilya kun mahugod lamang sila.
Magluwas sa livelihood ukon palangabuy-anan nagahatag man sang financial assistance ang STL pinaagi sa PCSO.
Nagapangamuyo na lamang si Roldan nga masanagan ang pinsar sang presidente kag magbag-o ang iya nga desisyon.
Samtang nahibaluan nga nagalab-ot sa P6 milyones ang bulanan nga ginabayad sang STL sa PCSO-Capiz.
