ROXAS CITY – Wala nasunod ang social distancing protocol sa ginhiwat nga pagpanagtag sang ayuda sa mga vendors sang DSWD sa Villareal stadium.
Nagtumpok ang mga resipyente sang P3,000 kag groceries nga ginpanagtag kag ginbalewala na ang ginapatuman nga minimum health protocols.
Sa pagpakig-angut sang Bombo Radyo kay City Councilor Moreno ‘’Moring’’ Gonzaga, ginpahayag sini nga wala nagkulang ang mga kapulisan kalakip ang mga katapu sang DSWD kag staff sang Kabalaka group nga yara sa lugar sa pagpahanumdum sa mga vendors nga magakuha sang ayuda.
Suno sa konsehal ang mga resipyente sang nasambit nga ayuda para sa mga vendors nga may pwesto ukon stalls sa Roxas City kag Panay.
Nagpasalamat naman ang isa ka fish vendor sa nasambit nga bulig, bangud madugangan ang iya kapital sa nabaton nga P3,000 kag makabakal pa sang mga kinahanglanon sa ila balay.
Samtang nagdepensa naman si Mr. Celso Cordova, events manager sang provincial information office angut sa ginaalegar paglapas sa social distancing sa nasambit nga kahiwatan.
Ginpahayag ni Cordova nga nagasunod ang mga vendors nga yara sa lugar kun ginapahanumdum sila sang minimum health protocols.
Naghinyo man si Cordova nga indi na kuntani paglaktan sang pulitika ang pagpanagtag sang ayuda sa mga resipyente nga vendors labi na karon nga nagapangatubang sang pandemya ang kalibutan.
Suno kay Cordova nga madamo sang ayuda nga ginahatag ang gobyerno indi lamang sa mga vendors kundi sa tanan nga nagakinahanglan.
Matandaan nga kapin sa mil 926 ang mga vendors nga nangin resipyente sang ayuda kalakip diri ang mil 799 ka vendors sa Roxas City kag 127 sa Panay.
#OverAllConsistentNumber1saCapiz
#BastaRadyoBOMBO
