Ginaduso ni Senator Sherwin Gatchalian ang isa ka layi nga nagatuyo sa pagduli sa mga kabataan nga wala pa naga-edad sang 16 anyos sa paggamit sang social media sa Pilipinas.
Sa idalom sang Senate Bill No. 2066 ukon Social Media Safety for Children Act, ginadumilian ang pagrehistro, pag-access, ukon pagpadayon sang account sang mga menor de edad sa bisan ano nga social media platform.
Tinutuyo sang nasambit nga layi nga maprotektahan ang mga kabataan gikan sa posible nga peligro sa digital nga kalibutan, lakip na diri ang epekto sa ila mental, moral, kag social nga kahimtangan tungod sa sobra nga paggamit sang social media.
Suno kay Gatchalian, kinahanglan na sang mas komprehensibo nga regulasyon bangud ang sitwasyon ang naga-focus lamang sa paghatag sang penalidad kag indi sa online exposure sang mga menor de edad.
Sa idalom man sang amu nga layi, obligasyon sang mga social media companies nga magpatuman sang strikto nga age verification systems pareho sang ID authentication, facial recognition, kag iban pa nga teknolohiya nga pareho sini.
Ginmanduan man sila nga maghimo sang regular nga audit agud mahibaluan kag ma-deactivate ang mga account sang mga menor de edad.
Ang Department of Information and Communications Technology (DICT) amu ang mangin responsable sa pagpatuman kag pagbantay sa mga social media platforms kag age verification providers.
Samtang Kun mangin layi ini, ang mga social media companies mahimo pamultahon sang masobra P1 million tubtob P10 million kada paglapas, kag dugang nga P100 kada adlaw samtang nagapadayon ang paglapas.
