Magapatuman ang gobyerno sang Australia sang pinakauna nga social media age restriction sa kalibutan agud maprotektahan ang mga pamatan-on sa kritikal nga yugto sang ila pag-uswag.
Sugod sa Disyembre 10, 2025, ang mga plataporma nga ginakabig nga limitado sa edad kinahanglan nga maghimo sang “makatarunganon nga mga tikang” para sa mga pagdumili sa mga Under 16 nga nagahimo sang mga account ukon may nagaluntad nga mga account.
Ang bag-o nga polisa isa ka sabat sa nagadamo nga mga kabalaka nahanungod sa desinyo sang social media nga naga-engganyo sang malawig nga oras sang paggamit kag nagabuyagyag sa mga pamatan-on sa kaundan nga mahimo makahalit sa ila ikaayong lawas kag kaayuhan.
Suno sa eSafety, ang mga plataporma nga may limitasyon sa edad nagalakip sang Facebook, Instagram, Snapchat, Threads, TikTok, Twitch, Twitter , YouTube, Kick kag Reddit.
Ang bag-o nga regulasyon kabahin sang Online Safety Act kag nagatuyo nga mahatagan sang proteksyon ang mga pamatan-on online.
Ang mga social media services nga wala makapugong sa mga menor de edad nga mga account mahimo nga multahan tubtob sa 150,000 kapenalty units, , katumbas sa ginabanta nga $49.5 milyon AUD.
Apang, nagapanindugan ang gobyerno nga ang bag-o nga regulasyon nagabutang sang minimum standard para sa kaluwasan sang mga kabataan online kag magaserbe nga pundasyon para sa mas malapad nga mga tikang sa palaabuton.
