Ginpahayag ni Justice Secretary Jesus Crispin Remulla nga may bag-o nga testigo sa kaso sang nagkaladula nga mga manugbulang, nga magapabaskog suno diri sa kredibilidad sang whistleblower nga si Julie “Dondon” Patidongan ukon alyas “Totoy.”
Isa si Patidongan sa mga akusado sa kaso nga luyag nga mangin testigo. Ginbuyagyag niya nga masobra 100 ka manugbulang ang gin-kidnap kag ginpatay, kag ginhaboy ang mga bangkay sa Taal Lake.
Suno kay Remulla, sibilyan ang bag-o nga saksi nga wala pa nagaguwa sa mga media report ang pangalan.
Kadungan sini, nakighinun-anon man si Remulla kay PNP chief Police General Nicolas Torre III sa Department of Justice main building agud talakayon ang pagkaulamid sang pila ka pulis sa kaso sang nagkaladula nga mga manugbulang.
Suno kay Remulla, nagpasugot si Torre sa iya nga request nga kakason sa puwesto ang isa ka opisyal sa pag-uyat sang kaso.
Gin-athag sang tiglikom nga indi involved sa kaso sang missing sabungeros ang opisyal apang may ara ini sang ginahulag nga nangin rason para madula ang pagsalig sa iya.
Gindugang ni Remulla nga indi kaupod ang opisyal sa 12 ka pulis nga nakitaan sang National Police Commission (NAPOLCOM) sang basehan para pasakaan sang administrative case kaangut sang nagkaladula nga mga sabungero.
Suno kay Remulla, makighinun-anon ini kay NAPOLCOM vice chairperson and executive officer Atty. Rafael Calinisan kun magkumpara sang mga detalye para sa direksyon nga ila ginausoy sa pagsolbar sa kaso.
Makighinun-anon man ini kay President Ferdinand Marcos Jr. subong nga semana agud talakayon ang paghulag sang kaso sang nagkaladula nga mga manugbulang, nga nahinambitan sang Presidente sa iya nga State of the Nation Address (SONA 2025) sang Lunes.
