ROXAS CITY – Amat-amat na nga nagabalik sa normal ang sitwasyon sa South Korea matapos nga ma-contain ang coronavirus disease (COVID-19) sa Daegu province.
Ini ang base sa report sa Bombo Radyo ni Bombo International Correspondent Erik Agaloos, tumandok sang Tarlac kag nakaba-se karon sa Bucheon, sa nasambit nga pungsod.
Suno diri, kasunod sang pagsaka sang kaso sang nasambit nga balatian, gintutukan sang gobyerno ang Daegu nga amo ang pinakaapektado sang virus.
Humalin suno diri sang katapusan pa sang Marso, amat-amat na nga na-contain ang paglapta sang nasambit nga balatian rason nga amat-amat naman nga naghalog ang mga quarantine protocols sa pungsod.
Ginpahayag sini nga nagapadayon ang ila nga trabaho bangud wala sila ginapabay-an sang ila nga employer nga may tagsa-tagsa ka mga preventive measures agud ma-protektahan sila batuk sa nasambit nga balatian.
Aminado ini nga mas nagakahangawa sila sa ila pamilya bangud sa padayon pa nga pagsaka sang kaso sang nasambit nga balatian sa Pilipinas.
