ROXAS CITY – Dako nga bulig ang ginapadala nga mga ‘emergency alert messages’ sang mga otoridad sa South Korea agud malikawan sang publiko ang mga lugar nga tuman nga apektado sang coronavirus disease (COVID-19) sa nasambit nga pungsod.
Ini ang ginpahayag ni Bombo International Correspondent Jose Luiggi Rivera, tumandok sang Dasmariñas, Cavite kag isa ka Overseas Filipino Worker sa Gyeonggi-do Cheoin-gu, Yongin-Si, South Korea sa iya nga report sa Bombo Radyo Roxas.
Suno kay Rivera, wala nagapapabaya ang mga otoridad sa nasambit nga pungsod agud solusyunan ang madasig nga pagsaka sang kaso sang amo nga balatian.
Pinaagi sa mga ginapadala nga mensahe suno diri, nahibaluan nila kun sa diin ang mga lugar nga apektado sang virus kag kun pila ka indibidwal ang infected sini.
Dako man ini nga bulig suno sa iya agud mahibaluan nila ang mga lugar nga dapat nila likawan nga padulungan.
Gilayon naman nga nagapatigayon sang pagdis-infect ang mga otoridad sa mga pampubliko nga lugar ilabi na ang mga natumod nga infected sang nasambit nga balatian.
