ROXAS CITY – Kuntento ang mga Pinoy sa South Korea sa mga ginahimo sang gobyerno sang amo nga pungsod agud pamatukan ang balatian nga coronavirus disease (COVID-19).
Ini ang ginpahayag ni Bombo International Correspondent Noreen Joyce Guerra, tumandok sang Barangay Milibili, Roxas City kag isa ka Overseas Filipino Worker (OFW) sa Yongsan-gu, Seoul, South Korea sa iya report sa Bombo Radyo Roxas.
Suno kay Guerra, padayon sa paghatag sang face masks ang mga otoridad sa publiko bilang proteksiyon sa nasambit nga balatian.
May pila ka mga kompaniya man suno diri ang nagapatuman sang ‘work from home’ kun sa diin wala na gina-obligar ang iban nga empleyado nga magsulod sa ila tagsa ka mga ginatrabahuan nga opisina.
Gindula man sini ang paghangawa sang mga Pinoy bangud wala man suno diri sila ginapabay-an sang gobyerno sang SoKor.
