Ginsiguro sang South Korea nga kaupod nila ang Pilipinas sa pagduso sang rules-based maritime order kag freedom of navigation sa West Philippine Sea.
Ini ang ginsiguro ni South Korean President Yoon Suk Yeol kay Pangulong Ferdinand Marcos Jr., matapos ang ila bilateral meeting sa Palasyo sang Malakanyang subong nga Lunes.
Sa Joint Press Conference, ginsiling ni South Korean President Yoon nga kaangay sang Pilipinas ginahatagan man nila sang importansya ang kalinong, katawhay kag kaluwasan sa West Philippine Sea nga isa ka critical sea lane of communication sa rehiyon.
Suno kay President Yoon, padayon sila nga makig-angut para sa pagsakdag ang international law sa kadagatan, kadungan sang mas hugot nga strategic cooperation.
Samtang, ginpunto ni Yoon nga sa idalum sang ginpirmahan nga kasugtanan sa maritime cooperation sang philippine kag korea coast guard, magka-upod nga ipatuman ang maritime security sa pagbato sa transnational crime, pagbayluhanay sang impormasyon, kag pagpatigayon sang search and rescue missions.
Mahibaluan nga ang maritime cooperation agreement sa tunga sang Philippine Coast Guard kag South Korean Coast Guard, tuman nga magapabaskog sa relasyon sang duha ka coast guard.
