ROXAS CITY – Nagpangayo sang patawad ang soldado nga nakatiro-patay sa kaupod nga soldado sa pamilya sang biktima.
Sa exclusive interview sang Bombo Radyo Roxas kay PFC Sargie Labao, ginpahayag sini nga wala sila sang gin-awayan ni PFC Delio Sebarillo kag nagulpihan lamang ini sang matiruhan ang kaupod sa trabaho.
Suno kay Labao nga antes ang insedente may nabatyagan na ini nga kahadluk nga indi maintindihan kag wala nahibaluan kun ano ang himoon.
Gin-ako sini nga siya mismo ang nagsugid sa mga kaupdanan kag opisyal sang matiruhan na si Sebarillo sa ila nga kampo sa Barangay Lagdungan, Tapaz, Capiz.
Samtang, nakahanda nga atubangon ni Labao ang konsekwensiya sang iya ginhimo nga pagtiro sa kaupod nga soldado.
Nahibaluan nga walo ka tuig na sa serbisyo si Labao kag duha ka tuig nga na-assign sa probinsiya sang Bohol sa diin nakaexperiensiya ini nga maka-enkwentro ang mga rebelde.
