Soldado nga nakatiro-patay sang kaupod nga soldado, may psychotic disorder suno sa iya asawa

ROXAS CITY — Na-diagnose nga may yara sang psychotic disorder ang soldado nga nagluthang-patay sa iya man kaupod nga soldado sa Barangay Lagdungan, Tapaz, Capiz base sa imbestigasyon sang mga katapo sang Tapaz Municipal Police Station.
Sa interview sang Bombo Radyo, ginpahayag ni SPO3 Joseph Gallenero, imbestigador sang Tapaz PNP nga nagtuad sa ila ang asawa sang suspek nga si PFC Sargie Labao nga kapin tatlo ka bulan nga na-confine ang soldado sa Armed Forces of the Philippines Medical Center ukon V. Luna General Hospital sa Quezon City bangud na-diagnose ini nga may yara sang psychotic disorder.
Suno diri nga nagtenir sa ospital ang soldado sumugod bulan sang Abril tubtob Hunyo 25 sini nga tuig antes nakabalik sa iya trabaho sa diin gin-assign ini sa 61st Infantry Battalion, Philippine Army.
Ginpahayag man ni Gallenero nga sang gin-usisa nila si Labao, nagtuad sa ila ang soldado nga ginkulbaan ini bangud may yara suno diri sang tuyo nga magpatay sa iya.
Nagaguha sa imbestigasyon sang kapulisan nga wala sang bagina sa tunga ni Labao kag sang biktima nga si PFC Delio Sebarillo antes natabo ang pagpangluthang.
Samtang natalana nga pasakaan sang pulisya sang panumbungon nga murder si Labao sa piskalya subong nga adlaw.
‘Nagulpihan lang’
Sa pihak nga bahin nagapangayo sang pasaylo si Labao sa pamilya ni Sebarillo sa natabo.
Sa exclusive interview sang Bombo Radyo kay Labao, ginpahayag sini nga wala man sila sang may gin-awayan ni Sebarillo kag nagulpihan lamang ini sang matiruhan niya ang kaupod niya nga soldado.
Suno sa iya nga antes ang insidente, nakabatyag ini siya sang kakulba kag wala makahibalo sang iya himuon.
Dugang pa ni Labao nga siya naman mismo ang nagsugid sa iya mga kaupdanan kag sa ila opisyal nga natiruhan niya si Sebarillo.
Nakahanda naman ang soldado nga batunon ang konsekwensiya sang iya nga nahimo.
Nahibaluan nga kapin walo ka tuig na sa serbisyo si Labao.
Nagtapos siya sa kurso nga BS Criminology sa Hercor College sadtong 2011 kag nangin kabahin sang Candidate Soldier Course Class 291-11.
Na-assign siya sang kapin duha ka tuig sa probinsya sang Bohol sa diin naka-eksperyensya siya nga maka-engkwentro sa mga rebelde.
‘Na trauma bangud sa engkuwentro’
Suno sa iya iloy nga si Ginang Aida Labao nga sumugod sadto, naobserbaran sang iya mga kaupdanan nga soldado nga masami na ini nagaduhong, wala nagakaon, wala nagakatulog kag indi ma-istorya.
Nagapati si Ginang Labao nga na-trauma ang iya anak sang maka-eksperyensiya ini sang engkwentro batuk sa mga rebelde.
Ginpanindugan sang ginang nga indi mahimo sang iya anak nga magpatay sang iya kaupod nga soldado kun yara lamang ini sa husto nga paminsaron.
Nahibaluan man nga kasado na si Labao kag may yara sang isa ka anak.