ROXAS CITY — Bilang pagkilala sa iya pagkabaganihan, ginhatagan sang posthumous combat medal nga Military Merit Medal with Bronze Spearhead Device sang militar si Sgt. Ricky Bill Farinas nga napatay sa engkwentro batuk sa rebelde nga New People’s Army sa Barangay Acuña, Tapaz, Capiz.
Suno kay LTC Leonardo Peña, commander sang 61st Infantry (Hunter) Battalion sang Philippine Army, nagakadapat nga makabaton sang kasubong nga pasidungog si Farinas bangud sa ginpakita sang soldado nga pagka-isganan sa pagtungod sang iya responsibilidad.
Si Farinas nga napatay sa engkwentro batuk sa mga rebelde matapos ini ang malukpan sang landmine sang nagligad nga bulan ang ginlubong na kahapon sa Barangay Dacuton sa banwa sang Dumarao.
Ginbaton naman sang iloy ni Farinas ang medalya nga ginpasidungod sang militar sa nagtaliwan nga soldado.
Ginpahayag man ni Peña nga magapadayon ang ila operasyon para matapna ang insurhensiya sa probinsiya, apang wala ini nagakahulogan suno sa iya nga nagatimalos sila sa mga rebelde bangud nga napatyan sila sang soldado.
Suno kay Peña, kabahin lamang ini sang ila nga pagtuman sa ila ginsumpaan nga serbisyo bilang mga soldado sang pungsod.
