ROXAS CITY – Magapangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002 naaresto nga tatlo ka mga indibidwal.
Ini matapos nadakpan ang mga ini sa ginkasa nga drug buybust operation sang Station Drug Enforcement Unit sang Roxas City Police Station sa isa ka lodging house sa Barangay Tiza, Roxas City.
Ginkilala ang nagkaladakpan nga sanday Vicente Reyes, 34 anyos sang Barangay Punta Tabuc, Ismael Avelino, 34 anyos sang Barangay Lawaan, kag Lila Tabanggay, 27 anyos sang San Roque Street.
Mahibaluan nga naaktuhan pa sang operatiba nga nagagamit sang ilegal nga droga sa sulod sang hulot sang nasambit nga lodge si Tabanggay.
Narekober sa ila posesyon ang 10 tanan ka sachets sang ilegal nga droga, isa ka pouch, cellphone, mga drug parapehrnalia, kag 500 pesos nga marked money.
Gilayon naman ginpaidalom sa drug test ang nadakpan nga mga suspek.
