Nagrekomendar si Appropriations Committee Chairman kag Ako Bicol Party-list Rep. Zaldy Co nga magtukod sang dako nga water impounding facilities sa Bicol Region agud batuan ang pagbaha kag solusyunan ang kakulangan sa tubig tion sang tag-ilinit.
Suno kayCo, ang nasambit nga mga pasilidad makabulig sa patubig sa mga ulumhan kag kinahanglanon sa tubig sang mga residente.
Ginpaanggid niya ini sa six-storey water impounding structure sa Bonifacio Global City nga nagasaho sang tubig-ulan.
Tinutuyo sini agud himuon nga mas masami nga pagtanum sang palay kung sa diin target nga maglab-ot sang tubtob tatlo ka ani sa sulod sang isa ka tuig kaangay sang Japan.
Ginsiling man ni Co ang pagpakighinun-anun sa DPWH para sa plano nga tunnel system sa kabukiran sang Bicol, nga magaserbi “flush system” agud i-divert ang sobra nga tubig baha padulong sa dagat.
Samtang ginsabat man sini ang alegasyon may kaangtanan sa dako nga pondo nga ginseparar sa Bicol base sa pahayag ni Senator Joel Villanueva.
Suno sa mamalidha, ang P61 billion nga pondo sang Bicol wala lamang ginpain para sa flood control projects kundi ini isa ka comprehensive budget kalakip ang pagpakay-o sang mga dalan, hospitals, government buildings, kag mga eskwelahan para sa 17 ka mga distrito sang Bicol, 6 nga probinsiya kag 7 ka mga siyudad.
